Job 9

Pa i tale Iob pi na bali God

1Ma Iob i ga tata, ma i ga biti:

2Maia, i dovot nam, iau nunure;
Ia kaka, a tutana na takodo dave ta ra mata i God?
3Ona ta tikai i mainge ba dir a vartoto me,
Pa na tale ba na bali tikai ta diat kana arip na marmar na tinir.
4I kabinana, ma i dekdek muka,
To ia bar i ga tur bat ia, ma i ga boina ka tana?
5I kari vue ra umana lualuana, ma pa dia nuk pa ia,
Ba i vue pukue diat ta kana kulot.
6I tang ra rakarakan a gunagunan ta kana pakana,
Tuk tar ra umana pagapaga tana dia dadadar.
7I tigal bat ra keake, ma pa i rada,
Ma i pulu bat ika ra umana tagul.
8I vuare ra bakut, ma pa ta tikai i maravut ia,
I rua ra bobol na ta;
9I pait ra Tagul na Ubene ma ra Kabatingtigur (Tabiara),
Ma ra ngala na maup ta ra matana taubar.
10I pait ra umana ngala na magit nina pa da kapa tana,
Ma ra umana magit na kinaian dia peal mat.

11I pakit iau, ma pa iau gire;
I bolo vurakit, ma pa iau babare.
12I kinim vake nam ba i mainge, ma to ia na tigal ia?
To ia na biti tana: U pait ra ava?
13God iat pa na ngo ta kana kankan,
Ra umana tena maramaravut kai Rab dia bura timtibum ta ra vavai ra kauna.
14Ma na dave ure iau, ina bali davatane,
Ma nuve ra umana pakana tinata ina pilak pa ia pi amir a vartoto me?
15Gala ina ga takodo, gala pa ina ga bali ia,
Ina kail ika tadav kaugu tena varkurai pi na mari iau.
16Gala ina vartuluai upi ia, ma na torom tagu,
Gala pa ina nurnur ba na valongore ra nilaigu.
17I bubur iau ma ra ngala na vuvu,
Ma i vakinkin iau, ma pa ta vuna;
18Pa i nur vue iau upi ina ngongo mat,
I vamapak kaugu nilaun parika.
19Gala da valar ra dekdekina ma ra dekdek i ra tarai, i lia kakit,
Ma gala da vartoto ta ra varkurai, to ia bar na takun ia?
20Gala ina ga takodo, gala ra ngiegu iat na takun iau,
Ma gala ina ga langalanga, gala ia iat na ga vaminana diat ba iau rara.
21Iau iat iau langalanga; pa iau nuk pa iau iat mulai;
Iau milikuane kaugu nilaun.
22Tika na mangana ka; damana iau biti:
I nila vue diat dia takodo ma damana bula diat dia kaina.
23Ba ra vinirua i pot vakaian,
I nongone ra purpuruan kai ra lavur tena takodo.

24Di tul tar ra rakarakan a gunagunan pire ra umana tena varpiam,
Ma i vapula ra umana tena varkurai kai ra tarai;
Ona ia iat pa i pait ia, to ia bar nam i vuna tana?
25Kaugu lavur bung dia panie lulut uka ta dir ma ra tena vinilau,
Dia purpuruk, ma pa dia varkuvo ma ra boina.
26Dia vilau lulut da ra mon i ararik ta,
Da ra minigulai i bebe ba upi ra ana kirip.
27Ona ina biti: Ina nuk vue kaugu nginarao,
Ina gugu ma ina ga;
28Iau burut ure ra agu umana kinadik,
Ma ba una takun boko iau.
29Da takun ot pa boko iau,
Ta ra ava ina ongaongor vakuku?
30Gala ina gumu ta ra mavoko i madoldol ba i polo,
Ma ina vagomgom vakakit ra ura limagu,
31Gala una vadudu iau ta ra pikai,
Ma kaugu umana mal diat a milikuane iau.
32Vakir ia ra tutana da iau, upi ina bali ia,
Ma upi amir a tur varurung ta ra varkurai.
33Pa ta na i ki pi na varkurai livuan ta mimir,
Ma pi na tulue ra limana ta mimir par.
34Boina ba na tak vue kana virit kan iau,
Ma koko na vaburut iau ma ra dekdekina,
Damana pa ina burutue pi ina tata;
Pa i damana, iau varkolono ko.
35